केंद्रीय पथकाकडून अंबड, मंठा, बदनापूर तालुक्यातील दुष्काळी स्थितीची पाहणी
जालना/प्रतिनिधी,दि.14
केंद्रीय आंतर मंत्रालयीन समितीच्या पथकाने आज जिल्ह्यातील अंबड, मंठा व बदनापूर तालुक्यातील दुष्काळी स्थितीची पाहणी केली. या पथकात केंद्रीय कापूस विकास अधिकारी डॉ. ए.एल. वाघमारे व मुल्यमापन व संनियंत्रण अधिकारी हरिष हुंबर्जे यांचा समावेश होता.
गुरुवार दि.14 डिसेंबर 2023 रोजी या पथकाने सकाळी अंबड तालुक्यातील ताडहदगाव, खडकेश्वर प्रकल्प, पांगरखेडा, डावरगाव, वालखेडा तसेच मंठा तालुक्यातील मेसखेडा, जाटखेडा आणि वाढेगाव पांढुर्णा, जालना तालुक्यातील पिंपरी डुकरी यासह दुपारनंतर बदनापूर तालुक्यातील बावणे पांगरी व तुपेवाडी या गावालगत असणाऱ्या शेतातील पिकांची पाहणी केली. यावेळी त्यांनी शेतकऱ्यांशी चर्चा करुन सद्यस्थितीतील पिक परिस्थिती व त्यांच्या समस्या जाणून घेतल्या. या पाहणी दरम्यान पथकासमवेत अपर जिल्हाधिकारी रिता मेत्रेवार, जिल्हा अधीक्षक कृषी अधिकारी गहिनीनाथ कापसे, जिल्हा पशुसंवर्धन उपायुक्त श्री. कांबळे, तहसीलदार श्री. शेळके, रुपा चित्रक, छाया पवार आदींसह कृषी व महसूल विभागाचे स्थानिक कर्मचारी, शेतकरी उपस्थित होते.