मराठवाडा मुक्ती संग्राम अमृत महोत्सव निमित्त महिलांकरिता स्व संरक्षण व सुरक्षेचे प्रशिक्षण
जालना/प्रतिनिधी,दि.28
मराठवाडा विभागातील सर्व जिल्ह्यांमध्ये दरवर्षी 17 सप्टेंबर हा दिवस मराठवाडा मुक्ती संग्राम दिन म्हणून साजरा करण्यात येतो. मराठवाडा मुक्ती संग्रामास यावर्षी 75 वर्षे पुर्ण होत असल्याने मराठवाडा मुक्ती संग्राम अमृत महोत्सवी वर्षात आयोजित करावयाच्या कार्यक्रमाची रूपरेषा निश्चित करण्यात आली आहे. या कार्यक्रमाअंतर्गत जिल्हा क्रीडा अधिकारी, जालना यांचेमार्फत महिलांकरिता स्व संरक्षण व सुरक्षेचे प्रशिक्षण शिबीर दि. 6 सप्टेंबर 2023 रोजी सकाळी 10.00 वाजता जिल्हा क्रीडा संकुल,जालना येथे आयोजित करण्यात आले आहे. या प्रशिक्षण शिबीरास तंज्ञप्रशिक्षक वर्ग मार्गदर्शन करणार आहे. या प्रशिक्षणाकरिता सर्व शासकीय, निमशासकीय, संघटना व खाजगी आस्थापनेवरील महिला कर्मचारी तसेच शहरातील इतर सर्व क्षेत्रातील महिलांनी आणि इयत्ता 8 वी पासून पुढे शिक्षण घेत असलेल्या विद्यार्थीनी, तरूणींनी या प्रशिक्षण शिबीरात सहभागी होऊन स्व संरक्षण आणि सुरक्षेचे धडे घ्यावेत. अधिक माहितीसाठी संतोष वाबळे, क्रीडा मार्गदर्शक मो.क्र. 7588169493 यांच्याशी संपर्क साधावा,असे आवाहन जिल्हा क्रीडा अधिकारी अरविंद विद्यागर यांनी केले आहे.
