18-जालना लोकसभा मतदारसंघ मतमोजणीसाठी प्रशासन सज्ज; सकाळी 8.00 वा. सुरु होणार मतमोजणी
जालना/प्रतिनिधी,दि.3
जालना लोकसभा मतदारसंघाच्या मतमोजणीसाठी प्रशासन सज्ज झाले आहे. मंगळवार, दि.4 जून 2024 रोजी जालना येथील एमआयडीसीतील सरस्वती अॅटो कम्पोनन्टस प्रा.लि. येथे सकाळी 8 वाजता मतमोजणीला प्रारंभ होणार आहे. सुरुवातीला टपाली मतदानाची मतमोजणी करण्यात येणार आहे. त्यानंतर मतदान यंत्रातील मतमोजणी केली जाणार आहे.
आज सकाळी जालना लोकसभा मतदारसंघाच्या निवडणूक निरीक्षक (जनरल) शैलबाला अंजना मार्टीन व मतमोजणी निरीक्षक प्रदीप अहलावत यांनी मतमोजणी केंद्राला भेट देऊन तेथील नियोजनाची पाहणी केली. यावेळी जिल्हाधिकारी तथा जिल्हा निवडणूक निर्णय अधिकारी डॉ. श्रीकृष्ण पांचाळ, जिल्हा पोलीस अधीक्षक अजयकुमार बन्सल, निवासी उपजिल्हाधिकारी सोहम वायाळ, उपजिल्हा निवडणूक अधिकारी शशिकांत हदगल आदी उपस्थित होते. श्रीमती मार्टिन या जालना, बदनापूर, भोकरदन तर श्री. अहलावत हे पैठण, फुलंब्री, सिल्लोड या विधानसभा मतदारसंघातील मतमोजणीचे निरीक्षण करणार आहेत. दरम्यान, आज दुपारी मतमोजणी केंद्रावर जिल्हाधिकारी तथा जिल्हा निवडणूक अधिकारी डॉ. श्रीकृष्ण पांचाळ यांच्या उपस्थितीत मतमोजणीची रंगीत तालीमही घेण्यात आली. यावेळी सर्व सहायक निवडणूक निर्णय अधिकारी आणि मतमोजणीसाठी नियुक्त अधिकारी, कर्मचारी उपस्थित होते. डॉ. पांचाळ म्हणाले की, मतमोजणीसाठी प्रशासनाची तयारी पूर्ण झाली आहे. चोख सुरक्षा व्यवस्थेत मतमोजणी केली जाणार आहे. मतमोजणी केंद्रावर माध्यमांच्या प्रतिनिधींना व्यवस्थित वृत्त संकलन करता यावे यासाठी मतमोजणी केंद्राच्या जवळच माध्यम कक्ष सुरु करण्यात आला आहे. मतमोजणी प्रक्रिया शांततेत व सुरळीत पार पाडण्यासाठी सर्वांनी सहकार्य करावे. सुमारे 1300 कर्मचाऱ्यांचा मतमोजणी प्रक्रियेत सहभाग राहणार आहे. सहा विधानसभा मतदारसंघनिहाय प्रत्येकी 14 अशा एकूण 84 टेबलवर मतमोजणी होणार आहे. तर पोस्टल मतदान पत्रिकेसाठी एकूण 10 टेबल असणार आहेत. मतमोजणीच्या दिवशी अधिकारी-कर्मचारी मतमोजणी केंद्रावर सकाळी 6 वाजता हजर राहणार आहेत, मतमोजणी केंद्रात मोबाईलसह जाण्यास मनाई करण्यात आली आहे. मतदान यंत्र ठेवण्यात आलेली स्ट्राँगरुम सकाळी 7 वाजता उघडण्यात येणार आहे. प्रत्यक्ष मतमोजणीस सकाळी 8 वाजता प्रारंभ होणार आहे. सुरुवातीला टपाली मतदानाची मतमोजणी करण्यात येणार आहे. 5 हजार 229 अधिकारी-कर्मचाऱ्यांनी टपाली मतदान केले तर सैन्यदलात कार्यरत मतदारांचे (3 जूनपर्यंत) 1 हजार 79 पोस्टल मतदान प्राप्त झाले आहे.
मतदारसंघनिहाय मतमोजणीच्या फेऱ्यांची संख्या पुढील प्रमाणे आहे. जालना- 24 फेऱ्या तर मतदान केंद्रांची संख्या 329, बदनापूर- 26 फेऱ्या तर मतदान केंद्रांची संख्या 358, भोकरदन-24 फेऱ्या तर मतदान केंद्रांची संख्या 329, सिल्लोड-26 फेऱ्या तर मतदान केंद्रांची संख्या 356, फुलंब्री- 26 फेऱ्या तर मतदान केंद्रांची संख्या 355, पैठण- 24 फेऱ्या तर मतदान केंद्रांची संख्या 334 आहे. जालना लोकसभा मतदारसंघासाठी सोमवार, दि. 13 मे 2024 रोजी मतदान पार पडले. जालना मतदार संघात जालना, बदनापूर, भोकरदन, सिल्लोड, फुलंब्री आणि पैठण या विधानसभा मतदारसंघांचा समावेश होतो. या सर्व मतदारसंघातील एकूण 2 हजार 61 मतदान केंद्रांवर सुमारे 13 लाख 61 हजार 226 मतदारांनी मतदानाचा हक्क बजावला. निवडणूक रिंगणात 26 उमेदवार आहेत.
