टपाली मतदानास मतदार सुविधा केंद्रात उत्साहात सुरुवात; कर्तव्यावरील मतदारांनी बजावला मतदानाचा हक्क
जालना/प्रतिनिधी,दि.8
भारत निवडणूक आयोगाच्या निर्देशाप्रमाणे लोकसभा सार्वत्रिक निवडणूक-2024 च्या निवडणूकीच्या कर्तव्यावर असलेले पोलिस, होमगार्ड, राज्य राखीव पोलिस दल, वाहनचालक या सारख्या कर्मचाऱ्यांसाठी टपाली मतदानासाठी जिल्हाधिकारी कार्यालयात मतदार सुविधा केंद्र तीन दिवस दि.10 ते 12 मे 2024 या कालावधीत चालू राहणार आहे. पहिल्या दिवशी शुक्रवार दि.10 मे 2024 रोजी दुपारी 3 वाजेपर्यंत 212 मतदारांनी आपला मतदानाचा हक्क बजावला. तरी लोकसभा निवडणूकीत कर्तव्यावर असलेल्या अधिकारी-कर्मचाऱ्यांनी या सुविधेचा लाभ घ्यावा व आपले मतदान अवश्य करावे, असे आवाहन उपजिल्हाधिकारी तथा पोस्टल बॅलेट कक्षाचे नोडल अधिकारी पदमाकर गायकवाड यांनी केले आहे.
जालना जिल्हाधिकारी कार्यालयातील पोस्टल बॅलेट कक्षाअंतर्गत स्थापित मतदार सुविधा केंद्रात शुक्रवार दि.10 मे 2024 रोजी मोठ्या उत्साहात मतदानास सुरुवात करण्यात आली. यावेळी मतदारांचा उत्स्फुर्त सहभाग लाभला. यावेळी आकर्षक रोषणाईसह रांगोळी, विविध रंगीबेरंगी सजावटही करण्यात आली होती. जिल्ह्यातील पोलिस, होमगार्ड, राज्य राखीव पोलिस दल, वाहनचालक या सारख्या कर्मचाऱ्यांसाठी टपाली मतदानाची सुविधा उपलब्ध करुन देणेकामी संबंधित कार्यालयातील एका अधिकाऱ्याची नोडल अधिकारी म्हणून नियुक्ती करण्यात आली होती. त्यानूसार आजपासून प्रत्यक्ष मतदानास सुरुवात करण्यात आली आहे. जिल्हाधिकारी कार्यालयातील मतदार सुविधा केंद्रात शुक्रवार दि.10 मे 2024 रोजी दुपारी 3 वाजेपर्यंत निवडणूकीच्या कर्तव्यावर असलेल्या 212 मतदारांनी मतदान केले. जालना जिल्ह्यातील फॉर्म 12 भरलेले एकुण 1 हजार 33 पात्र मतदार या सुविधा केंद्रावर मतदान करणार आहेत. यापूर्वी दि. 6 व 7 मे 2024 रोजी सहायक निवडणूक निर्णय अधिकाऱ्यांच्या स्तरावर लोकसभा सार्वत्रिक निवडणूकीत निवडणूक कर्तव्यावर असलेल्या कर्मचारी-अधिकाऱ्यांचे मतदान दुसऱ्या प्रशिक्षणादरम्यान तेथील प्रशिक्षण केंद्रावर घेण्यात आले. तथापि जिल्ह्यातील पोलिस, राज्य राखीव दल, होमगार्डस, चालक आदि निवडणूक कर्तव्यावरील कर्मचाऱ्यांचे मतदान निवडणूक निर्णय अधिकारी यांच्या स्तरावरील मतदार सुविधा केंद्रात घेण्यात येत आहे. जालना जिल्ह्यात मतदार सुविधा केंद्र सहाय्यक निवडणूक निर्णय अधिकारी अथवा विधानसभा मतदार संघ तसेच जिल्हा निवडणूक निर्णय अधिकारी स्तरावर उपलब्ध करुन देण्यात आलेले आहे. लोकसभा सार्वत्रिक निवडणूकीच्या प्रक्रियेत प्रत्यक्ष सहभागी असलेल्या अधिकारी -कर्मचाऱ्यांचे दुसरे प्रशिक्षण 6 व 7 मे 2024 रोजी पार पडले, यामध्ये त्यांनी आपला मतदानाचा हक्क बजावला. तर जिल्हा निवडणूक निर्णय अधिकारी स्तरावरील अधिकारी -कर्मचाऱ्यांसाठी दि.10 ते 12 मे 2024 दरम्यान मतदानासाठी मतदार सुविधा केंद्र उपलब्ध करुन देण्यात आलेले आहे. जालना जिल्ह्यातील निवडणूकीच्या प्रक्रियेत सहभागी असलेल्या दुसऱ्या जिल्ह्यातील अधिकारी-कर्मचारी जे जालना जिल्ह्यात कार्यरत आहेत अशा मतदारांची संख्या 74 आहे. अशी माहितीही नोडल अधिकारी श्री.गायकवाड यांनी यावेळी दिली.
