विधानसभा निवडणुकीसाठी नियुक्त सर्व निवडणूक निरीक्षक जिल्ह्यात दाखल
जालना/प्रतिनिधी,दि.29
विधानसभा सार्वत्रिक निवडणूक-2024 च्या पार्श्वभूमीवर निवडणूकीमधील सर्व प्रक्रियेवर नियंत्रण ठेवण्यासाठी भारत निवडणूक आयोगाने निवडणूक निरीक्षक (सामान्य), निवडणूक निरीक्षक (पोलीस) व निवडणूक निरीक्षक (खर्च) यांची जालना जिल्ह्यासाठी नियुक्ती केली आहे. हे सर्व निवडणूक निरीक्षक निवडणूक कामकाजाकरीता जालना शहरात दाखल झाले असल्याची माहिती निवडणूक विभागाकडून देण्यात आली आहे.
भारत निवडणूक आयोगाच्या दि. 15 ऑक्टोबर, 2024 च्या अधिसूचनेनुसार महाराष्ट्र विधानसभा सार्वत्रिक निवडणूक-2024 घोषणा झाली आहे. यानुसार दि. 20 नोव्हेंबर, 2024 रोजी मतदान प्रक्रिया पार पडणार असून दि. 23 नोव्हेंबर, 2024 मतमोजणीची प्रक्रिया पार पडणार आहे. या सर्व प्रक्रियेवर नियंत्रण ठेवण्यासाठी भारत निवडणूक आयोगाने निवडणूक निरीक्षक (सामान्य), निवडणूक निरीक्षक (पोलीस) व निवडणूक निरीक्षक (खर्च) यांची जालना जिल्ह्याकरीता नियुक्ती केली असून सर्व निवडणूक निरिक्षक जालना शहरात दाखल झाले आहेत.
जिल्ह्यातील 101-जालना, 102 बदनापूर (अ.जा.) आणि 103 भोकरदन या विधानसभा मतदार संघाकरीता निवडणूक निरीक्षक (सामान्य) म्हणून उत्तर प्रदेशचे माध्यमिक शिक्षा विभागाचे सचिव 2008 च्या बॅचचे आय. ए. एस. अधिकारी वेद पती मिश्र यांची नियुक्ती करण्यात आली आहे. ते शासकीय विश्रामगृह जालना येथील हिमालय कक्षात वास्तव्यास राहणार असून, सामान्य नागरिकांना सकाळी 9.30 ते 10.30 यावेळेत भेटण्यासाठी उपलब्ध राहणार आहेत. तसेच 99-परतुर आणि 100-घनसावंगी विधानसभा मतदार संघासाठी निवडणूक निरीक्षक (सामान्य) म्हणून बिहार कॅडरचे 2013 बॅचचे आय. ए. एस. अधिकारी श्री. नवीन यांची नियुक्ती करण्यात आली असून, ते शासकीय विश्रामगृह जालना येथील पुर्णा कक्षात वास्तव्यास राहणार असून, सामान्य नागरिकांना सकाळी 9.30 ते 10.30 या वेळेत भेटण्यासाठी उपलब्ध राहणार आहेत. तर 99-परतुर आणि 100-घनसावंगी, 101-जालना, 102-बदनापूर (अ.जा.), 103-भोकरदन या पाचही विधानसभा मतदार संघासाठी पोलीस निरीक्षक म्हणून तामिळनाडू कॅडरच्या 2005 च्या आय. पी. एस. अधिकारी श्रीमती झेड ॲनी विजया यांची नियुक्ती करण्यात आली आहे. त्या शासकीय विश्रामगृहातील सह्याद्री कक्षात वास्तव्यास राहणार असून, त्या सकाळी 9.30 ते 10.30 या वेळेत सामान्य व्यक्तींना भेटण्यासाठी उपलब्ध राहणार आहेत. जिल्ह्यातील 99- परतुर, 100- घनसावंगी, 101- जालना, 102- बदनापूर (अ.जा.) 103- भोकरदन या पाचही विधानसभा मतदार संघाकरीता खर्च निरीक्षक म्हणून आय. आर. एस. (सी ॲन्ड सीई) अधिकारी देव प्रकाश बमनावत यांची नियुक्ती केली आहे, ते शासकीय विश्रामगृहातील गोदावरी कक्षात वास्तव्यास राहणार असून, ते सकाळी 9.30 ते 10.30 या वेळेत सामान्य व्यक्तींना भेटण्यासाठी उपलब्ध राहणार आहेत. अशी माहिती निवडणूक विभागाकडून कळविण्यात आली आहे.
