राजर्षी शाहू महाराज जयंती पर्वानिमित्त जात प्रमाणपत्र पडताळणीची विशेष मोहिम
जालना/प्रतिनिधी,दि.2
राजर्षी शाहू महाराज जयंतीचे औचित्य साधून दि. 26 जुन ते 30 जुलै 2024 या कालावधीत जात प्रमाणपत्र पडताळणीसाठी विशेष मोहिम समिती कार्यालयामार्फत हाती घेण्यात आली आहे. तरी ज्या विद्यार्थ्यांनी अद्याप प्रस्ताव सादर केलेला नाही, अशा विद्यार्थ्यांनी www.bartievalidity.maharashtra.gov.in या संकेतस्थळावर ऑनलाईन पध्दतीने जात प्रमाणपत्र पडताळणीचे अर्ज सादर करावेत व त्याची एक प्रत जिल्हा जाती प्रमाणपत्र पडताळणी समितीकडे सादर करावी, असे आवाहन जिल्हा जाती प्रमाणपत्र पडताळणी समितीचे सदस्य सचिव तथा संशोधन अधिकारी प्रदीप भोगले यांनी प्रसिध्दीपत्रकाद्वारे केले आहे.
चालु शैक्षणिक वर्षात राज्य सामाईक प्रवेश परिक्षेच्या आधारे आरक्षित जागेवर प्रवेश घेवू इच्छिणाऱ्या अनुसूचित जाती, विजाभज, इमाव, विमाप्र या प्रवर्गातील विद्यार्थ्यांना जात वैधता प्रमाणपत्र सादर करणे अनिवार्य आहे. त्यामुळे इयत्ता अकरावी व बारावी विज्ञान शाखेत शिकत असलेल्या तसेच याच वर्षी इयत्ता बारावी उत्तीर्ण झालेल्या विद्यार्थ्याच्या अर्जाची पडताळणी करण्याची कार्यवाही जिल्हा जाती प्रमाणपत्र पडताळणी समितीच्या स्तरावर सुरु आहे. जात वैधता प्रमाणपत्र देण्याकरीता समितीस पुरेसा अवधी मिळावा तसेच जात वैधता प्रमाणपत्राअभावी मागासवर्गीय विद्यार्थी व्यावसायिक अभ्यासक्रमात प्रवेश मिळण्यापासून वंचित राहू नये, यासाठी विद्यार्थी विहित वेळेत समितीकडे अर्ज सादर करणे आवश्यक आहे. तसेच ज्या मागासवर्गीय विद्यार्थ्यांनी वैधता प्रमाणपत्र मिळणेकरीता समितीकडे अर्ज सादर केलेले नाहीत, त्यांनी ज्या जिल्ह्यातील जातीचा दाखला प्राप्त केलेला आहे त्या जिल्हयाच्या जात प्रमाणपत्र पडताळणी समितीकडे जात वैधता प्रमाणपत्र मिळणेकरीता त्वरित अर्ज सादर करावेत. ज्या विद्यार्थ्यांचे जात प्रमाणपत्र पडताळणीचे अर्ज समितीकडे प्रलंबित आहेत व ज्यांना समितीने ऑनलाईन त्रुटी कळविल्या आहेत, अशा अर्जदारांनी अर्जातील त्रुटींची पुर्तता करण्यासाठी समिती कार्यालयात प्रत्यक्ष संपर्क करावा व या विशेष मोहीमेचा लाभ घ्यावा, असे प्रसिध्दीपत्रकाद्वारे कळविले आहे.
