समान व असमान निधी योजनांसाठी प्रस्ताव सादर करण्याचे आवाहन
छत्रपती संभाजीनगर/प्रतिनिधी,दि.3
केंद्र शासनाच्या सांस्कृतिक कार्य विभागांतर्गत राजा राममोहन रॉय ग्रंथालय प्रतिष्ठान, कोलकाता यांच्या समान निधी व असमान निधी योजनेंतर्गत राज्यातील शासनमान्य सार्वजनिक ग्रंथालयांच्या सर्वांगिण विकासासाठी अर्थसहाय्याच्या विविध योजना ग्रंथालय संचालनालयामार्फत राबविण्यात येणार आहेत. 2022-24 साठी विविध समान व असमान निधी योजनांचा लाभ घेण्यासाठी राज्यातील शासनमान्य सार्वजनिक ग्रंथालयांना विहित नमुन्यात प्रस्ताव सादर करण्याचे आवाहन संचालनालयाकडून करण्यात आले आहे.
संदर्भातील नियम, अटी व अर्जाचा नमुना प्रतिष्ठानच्या www.rrrlf.gov.in या संकेतस्थळावर उपलब्ध आहेत. इच्छुक ग्रंथालयांनी अर्जाचा नमुना संकेतस्थळावरून उपलब्ध करुन घ्यावा, असे आवाहन करण्यात आले आहे.
सन 2023-24 साठीच्या समान निधी योजना- इमारत बांधकाम व विस्तार अर्थसहाय्य योजना – रुपये 25 लाख रूपये.
सन 2022-23 साठीच्या असमान निधी योजना ग्रंथालय सेवा देणाऱ्या स्वयंसेवी संस्थांना ग्रंथ, साधन सामग्री, फर्निचर, इमारत बांधकाम व विस्तार यासाठी अर्थसहाय्य. (फर्निचर खरेदी 4 लाख व इमारत बांधकाम 10 ते 15 लाख रूपये)
राजा राममोहन रॉय ग्रंथालय प्रतिष्ठान “ज्ञान कोपरा” विकसित करण्यासाठी अर्थसहाय्य (रु.2.50 लाख) व विशेष अर्थसहाय्य आधुनिकीकरण (रु.2.00 लाख).
महोत्सवी वर्ष जसे 50/60/75/100/125/150 वर्ष साजरे करण्यासाठी अर्थसहाय्य (6.20 लाख व इमारत विस्तार रुपये 10.00 लाख रूपये)
राष्ट्रस्तरीय चर्चासत्र, कार्यशाळा, प्रशिक्षण वर्ग व जागरुकता कार्यक्रम आयोजनासाठी अर्थसहाय्य (रु.1.50 लाख रुपये 2.50 लाख/रु.3.00 लाख)
बाल ग्रंथालय व राजा राममोहन रॉय ग्रंथालय “बाल कोपरा स्थापन” करण्याकरीता अर्थसहाय्य (रु.6.80 लाख).
योजनांचा लाभ घेण्यासाठी इच्छुकांनी प्रतिष्ठानचे www-rrrlf.gov.in संकेतस्थळाला भेट द्यावी. आवश्यकता असल्यास संबंधित जिल्हा ग्रंथालय अधिकारी कार्यालयाशी संपर्क साधावा. ग्रंथालयांनी वरील पैकी कोणत्याही एका योजनेसाठीचा प्रस्ताव विहित मार्गाने व मुदतीत आवश्यक कागदपत्रांसह इंग्रजी व हिंदी भाषेत चार प्रतीत संबंधित जिल्हा ग्रंथालय अधिकारी कार्यालयास 30 नोव्हेंबर, 2023 पर्यंत पोहचतील अशा बेताने पाठवावेत, असे आवाहन ग्रंथालय संचालक दत्तात्रेय क्षीरसागर यांनी केले आहे.
