विधानसभा मतदार संघासाठी 5 उमेदवारांचे 6 अर्ज दाखल
आजपर्यंत 261 उमेदवारांना 647 नामनिर्देशन अर्जाचे वितरण
जालना/प्रतिनिधी,दि.23
विधानसभा सार्वत्रिक निवडणूकीच्या अनुषंगाने जिल्ह्यातील 99- परतूर, 100-घनसावंगी, 101-जालना, 102- बदनापूर (अ.जा.) आणि 103-भोकरदन या पाच विधानसभा मतदारसंघातील निवडणुकीसाठी आज 3 उमेदवारांनी 3 नामनिर्देशन अर्ज दाखल केले आहेत. त्यामुळे आजपर्यंत एकुण 5 उमेदवारांचे 6 नामनिर्देशन अर्ज स्विकारण्यात आले असल्याची माहिती जिल्हाधिकारी तथा जिल्हा निवडणूक अधिकारी डॉ. श्रीकृष्ण पांचाळ यांनी दिली आहे.
99-परतूर, 101-जालना आणि 103-भोकरदन या तीन विधानसभा मतदार संघासाठी आज कोणीही अर्ज दाखल केला नाही. बुधवार दि. 23 ऑक्टोबर, 2024 रोजी 100-घनसावंगी मतदारसंघासाठी ज्ञानेश्वर प्रतापराव पवार (अपक्ष) यांनी तर 102- बदनापूर विधानसभा मतदारसंघासाठी चाबुकस्वार राहुल निरंजन (अपक्ष) आणि मगरे भाऊसाहेब भागाजी (अपक्ष) यांनी प्रत्येकी एक नामनिर्देशन अर्ज दाखल केले आहे. याप्रमाणे आज तीन नामनिर्देशन अर्ज दाखल केले असल्याची माहिती जिल्हाधिकारी तथा जिल्हा निवडणूक अधिकारी डॉ. श्रीकृष्ण पांचाळ यांनी दिली.
आजपर्यंत एकूण 261 इच्छुक उमेदवारांना 647 नामनिर्देशन अर्जाचे वितरण करण्यात आले आहे. संबंधित निवडणूक निर्णय अधिकारी तथा उपविभागीय अधिकारी यांनी उमेदवारांचे नामनिर्देशन पत्र दाखल करुन घेतले. उमेदवारांना मंगळवार, दि. 29 ऑक्टोबर पर्यंत कार्यालयीन कामकाजाच्या दिवशी सकाळी 11 ते 3 यावेळेत आपले नामनिर्देशन पत्र सादर करता येणार आहे. बुधवार, दि. 30 ऑक्टोबर, 2024 रोजी नामनिर्देशन पत्रांची छाननी करण्यात येणार असून, सोमवार, दि. 4 नोव्हेंबर, 2024 पर्यंत उमेदवारांना आपले अर्ज मागे घेता येणार आहे. तर बुधवार, दि. 20 नोव्हेंबर, 2024 रोजी विधानसभा सार्वत्रिक निवडणूकीसाठी मतदान होणार आहे. या निवडणूकीचा निकाल शनिवार दि. 23 नोव्हेंबर, 2024 रोजी जाहिर केला जाणार आहे.
