श्री नितीन भाऊ मोरे यांच्या शुभहस्ते संभाजीनगर येथे संस्कार Expo चे भूमीपूजन उत्साहात संपन्न
छ. संभाजीनगर /अनिल वाढोणकर,दि.10
छत्रपती संभाजीनगर येथे आयोजित करण्यात येणाऱ्या संस्कार Expo 2026 च्या भूमीपूजनाचा सोहळा जबिंदा मैदान,संभाजीनगर येथे अत्यंत उत्साहपूर्ण आणि धार्मिक वातावरणात पार पडला. या कार्यक्रमाचे भूमीपूजन श्री नितीनभाऊ मोरे यांच्या शुभहस्ते संपन्न झाले. यावेळी आयोजक, मान्यवर, विविध क्षेत्रातील प्रतिनिधी तसेच सेवेकरी प्रतिनिधींची मोठ्या संख्येने उपस्थिती होती.
या भूमीपूजन सोहळ्यात विधीपूर्वक भूमीपूजन करण्यात आले असून, या उपक्रमाच्या यशस्वीतेसाठी सर्वांनी सामूहिक प्रार्थना केली. संस्कार Expo 2026 हा केवळ एक प्रदर्शन नसून समाजात मूल्यसंस्कारांची जपणूक, शिक्षणाचे महत्त्व, आरोग्यविषयक जागरूकता, तसेच युवकांना योग्य करिअर मार्गदर्शन देण्याचा एक व्यापक प्रयत्न आहे.
या Expo च्या माध्यमातून विद्यार्थ्यांसाठी शैक्षणिक मार्गदर्शन, स्पर्धा परीक्षा, बँकिंग आणि विविध करिअर संधींबाबत माहिती दिली जाणार आहे. तसेच उद्योजकतेला चालना देण्यासाठी व्यवसाय व उद्योग क्षेत्रातील मार्गदर्शन, स्टार्टअप्स संदर्भातील सल्ला, तसेच रोजगाराच्या विविध संधी यावर विशेष भर देण्यात येणार आहे. पालकांसाठीही पाल्यांच्या शैक्षणिक, मानसिक आणि सामाजिक प्रश्नांवर तज्ज्ञांकडून समुपदेशनाची सुविधा उपलब्ध करून देण्यात येणार आहे.
कार्यक्रमादरम्यान उपस्थित श्री नितीन भाऊ मोरे यांनी आपल्या मनोगतातून सांगितले की, आजच्या वेगवान आणि डिजिटल युगात मूल्यसंस्कारांची जपणूक करणे अत्यंत आवश्यक आहे आणि संस्कार Expo 2026 हा त्यासाठी एक प्रभावी मंच ठरणार आहे.
समाजातील सर्व घटकांना एकत्र आणून सकारात्मक विचारांची देवाणघेवाण करण्यासाठी हा उपक्रम निश्चितच मोलाची भूमिका बजावेल, असा विश्वास त्यांनी व्यक्त केला.
या Expo मध्ये विविध ज्ञानवर्धक स्टॉल्स, सात्विक आहार, आरोग्य तपासणी, करिअर मार्गदर्शन सत्रे, तज्ज्ञांची व्याख्याने, तसेच विविध सामाजिक आणि शैक्षणिक उपक्रमांचे आयोजन करण्यात येणार असल्याची माहिती आयोजकांनी दिली. या उपक्रमाला शहर आणि परिसरातील नागरिकांकडून मोठा प्रतिसाद मिळेल, अशी अपेक्षा व्यक्त करण्यात आली.
या भूमीपूजन सोहळ्यामुळे Expo च्या तयारीला अधिक वेग मिळाला असून, येत्या काही दिवसांत या कार्यक्रमाची भव्य आणि यशस्वी अंमलबजावणी करण्यासाठी सर्व यंत्रणा सज्ज होत असल्याचे आयोजकांनी सांगितले. संस्कार Expo 2026 हा छत्रपती संभाजीनगरसाठी एक प्रेरणादायी आणि दिशादर्शक उपक्रम ठरेल, असा विश्वास या प्रसंगी व्यक्त करण्यात आला.
