राजमाता जिजाऊ इंग्लिश स्कूल, टेंभुर्णी येथे विद्यार्थ्यांसमवेत आषाढी एकादशी उत्साहात साजरी

जाफराबाद/दत्ता देशमुख,दि.25

राजमाता जिजाऊ इंग्लिश स्कूल, टेंभुर्णी येथे आषाढी एकादशीचा पवित्र सण मोठ्या भक्तिभावाने व उत्साहपूर्ण वातावरणात साजरा करण्यात आला. महाराष्ट्राच्या सांस्कृतिक परंपरेचे जतन व विद्यार्थ्यांमध्ये आध्यात्मिक, नैतिक आणि सामाजिक मूल्यांची जपणूक व्हावी या उद्देशाने या कार्यक्रमाचे आयोजन करण्यात आले. कार्यक्रमाचे अध्यक्ष तथा संस्थापक अध्यक्ष मा. संजयजी लहाने सर यांच्या हस्ते भगवान श्री विठ्ठल-रुक्मिणी यांच्या प्रतिमेचे पूजन व दीपप्रज्वलन करण्यात आले. विद्यार्थ्यांनी वारकरी वेशभूषा परिधान करून टाळ-मृदंगाच्या गजरात “ज्ञानोबा-तुकाराम”च्या जयघोषात दिंडी काढली. यावेळी विद्यार्थ्यांनी संत तुकाराम महाराज व संत ज्ञानेश्वर महाराज यांच्या अभंगांचे सादरीकरण करून उपस्थितांची मने जिंकली. विद्यार्थ्यांनी आषाढी एकादशीचे धार्मिक व सांस्कृतिक महत्त्व स्पष्ट करणारी भाषणे सादर केली. तसेच भक्तिगीते, नृत्य आणि विठ्ठल भक्तीवर आधारित विविध सांस्कृतिक कार्यक्रमांनी कार्यक्रमाची शोभा वाढविली. शिक्षकांनी विद्यार्थ्यांना वारकरी संप्रदायाचा इतिहास, संतपरंपरा आणि भक्ती, समता, सेवा व सदाचार या मूल्यांचे महत्त्व समजावून सांगितले. यावेळी शाळेचे मुख्याध्यापक, शिक्षकवृंद तसेच सर्व विद्यार्थी मोठ्या संख्येने उपस्थित होते. कार्यक्रमाच्या शेवटी सर्वांनी समाजात बंधुभाव, सद्भावना आणि संस्कार जपण्याची प्रतिज्ञा केली.