ग्रामीण विद्यार्थ्यांची कलाकृती; ‘आनंददायी शनिवार’ उपक्रमात शाडू मातीच्या गणपतीची निर्मिती

बदनापूर/प्रतिनिधी, दि.12

प्रतिभा माध्यमिक विद्यालय, काजळा येथे विद्यार्थ्यांचा सर्जनशीलतेला व पर्यावरणपूरकतेला वाव
काजळा, ता. बदनापूर, जि. जालना :
प्रतिभा माध्यमिक विद्यालय, काजळा येथे ‘आनंददायी शनिवार’ या उपक्रमांतर्गत विद्यार्थ्यांनी शाडू मातीपासून आकर्षक व पर्यावरणपूरक गणपतीची मूर्ती तयार करून आपल्या कलागुणांना सुंदर स्वरूप दिले. ग्रामीण भागातील विद्यार्थ्यांनी स्वतःच्या कल्पकतेतून साकारलेल्या या गणेशमूर्तीने सर्वांचे लक्ष वेधून घेतले.
‘आनंददायी शनिवार’ उपक्रमाचा उद्देश विद्यार्थ्यांमध्ये केवळ पाठ्यपुस्तकी ज्ञान न देता त्यांच्या अंगी असलेल्या सर्जनशीलता, कलाकौशल्य, कल्पनाशक्ती, निरीक्षणशक्ती आणि समूहभावना यांचा विकास करणे हा आहे. याच अनुषंगाने विद्यार्थ्यांना शाडू माती उपलब्ध करून देत गणपतीची मूर्ती तयार करण्याचे प्रात्यक्षिक व कृतीआधारित मार्गदर्शन करण्यात आले. यामध्ये श्रेया उमाकांत करे, शिवानी दिलीप पारखे, भक्ती घनश्याम देवकाते,अंजली सुनील जाधव,रेणुका किसन जाधव, रोशनी सचिन डोंगरे आणि मयुरी जगदीश कोळेकर या विद्यार्थ्यांनी अत्यंत उत्साहाने शाडू माती मळून त्यापासून गणपतीची मूर्ती तसेच विविध सजावटीच्या वस्तू तयार केल्या. मूर्ती तयार करताना विद्यार्थ्यांनी पारंपरिक कलाकुसरीसोबतच पर्यावरणपूरक गणेशोत्सवाचा संदेशही दिला. स्वतःच्या हाताने तयार केलेली गणेशमूर्ती पाहून विद्यार्थ्यांच्या चेहऱ्यावर आनंद व समाधान दिसून येत होते.
या उपक्रमामुळे विद्यार्थ्यांना ‘स्वतः करून शिकणे’ या शिक्षणपद्धतीचा अनुभव मिळाला. मातीशी प्रत्यक्ष काम करताना संयम, एकाग्रता, बारकावे समजून घेणे आणि एकमेकांना सहकार्य करणे यांसारख्या गुणांचा विकास झाला.
शाडू मातीच्या गणपतीमुळे पर्यावरण संवर्धन, जलप्रदूषण टाळणे आणि नैसर्गिक साधनसंपत्तीचे महत्त्व याबाबतही विद्यार्थ्यांमध्ये जनजागृती झाली. विद्यार्थ्यांनी तयार केलेली ही कलाकृती शाळेतील शिक्षक, पालक व ग्रामस्थांसाठी कौतुकाचा विषय ठरली.
या उपक्रमासाठी मुख्याध्यापक, शिक्षक व शिक्षकेत्तर कर्मचाऱ्यांनी विद्यार्थ्यांना मार्गदर्शन व प्रोत्साहन दिले. ग्रामीण भागातील विद्यार्थ्यांच्या कलागुणांना व्यासपीठ मिळवून देणारे असे उपक्रम सातत्याने राबविण्याची गरज असल्याचे मत यावेळी व्यक्त करण्यात आले.
‘आनंददायी शनिवार’मधून शिक्षणासोबत कला, संस्कार आणि पर्यावरण संवर्धनाचा संदेश देणारी ही उपक्रमशीलता विद्यार्थ्यांच्या सर्वांगीण विकासासाठी निश्चितच प्रेरणादायी ठरत आहे.