जनगणना २०२७ कार्यक्रमास प्रारंभ. नागरिकांनी सहकार्य करण्याचे तहसीलदार उद्धव कदम यांचे जनतेला आवाहन

उरण/विठ्ठल ममताबादे,दि.30

भारत सरकारच्या महत्त्वाकांक्षी जनगणना २०२७ कार्यक्रमास सुरुवात झालेली असून या अंतर्गत पहिल्या टप्प्यातील विविध प्राथमिक कामे सध्या प्रगतीपथावर आहेत. सदर जनगणना ही देशाच्या विकास आराखड्यासाठी अत्यंत महत्त्वाची प्रक्रिया असून, अचूक व अद्ययावत माहिती संकलित करण्यासाठी नागरिकांचे सक्रिय सहकार्य आवश्यक आहे. सदर कार्यक्रमांतर्गत प्रगणक व पर्यवेक्षक यांची नियुक्ती करण्यात येत असून, क्षेत्रनिहाय घरगुती माहिती संकलन, गाव/शहर नकाशे तयार करणे (Mapping) आदी कामांना गती देण्यात येत आहे. यावेळी नागरिकांना कळविण्यात येते की, दि. ०१ मे २०२६ ते १५ मे २०२६ या कालावधीत स्वगणना (Self Enumeration) सुविधा उपलब्ध करून देण्यात येणार आहे. नागरिकांनी स्वतःच्या मोबाईलद्वारे अधिकृत वेबसाईटवर जाऊन आपली माहिती अचूकपणे भरावी, असे आवाहन उरण तालुक्याचे तहसीलदार डॉ. उद्धव कदम यांनी जनतेला केले आहे. कोट (चौकट ):- जनगणना संदर्भातील अधिक माहिती व स्वगणना करण्यासाठी नागरिकांनी खालील अधिकृत वेबसाईटचा उपयोग करावाः https://censusindia.gov.in स्व-गणना प्रक्रिया खालीलप्रमाणे आहे: १)अधिकृत पोर्टलवर प्रवेश करून लॉगिन करा. २) कुटुंब प्रमुखाचे नाव व मोवाईल क्रमांकाच्या आधारे कुटुंब नोंदणी करा. ३) पसंतीची भाषा निवडून मोबाईलवर प्राप्त झालेला OTP प्रविष्ट करा. ४) राज्य, जिल्हा व स्थानिक पातळीवरील आवश्यक तपशील निवडा. ५) डिजिटल नकाशावर आपल्या निवासस्थानाचे अचूक स्थान निश्चित करून मार्क करा. ६)दिलेली प्रश्नावली काळजीपूर्वक पूर्ण करा. ७) भरलेली माहिती पूर्वावलोकन करून आवश्यक त्या दुरुस्त्या करा. ८) अंतिम सादरीकरण (Submit) करा. ९)प्रगणक भेटीस आल्यास त्यांना आपला SE ID अवश्य कळवा. १०) SE ID मधील माहिती व प्रगणकाने संकलित केलेली माहिती जुळल्यास ती माहिती ग्राह्य धरण्यात येईल. ============================================================================ जनगणना ही केवळ शासकीय प्रक्रिया नसून देशाच्या भविष्यासाठी अत्यंत महत्त्वाची जबाबदारी आहे. त्यामुळे सर्व नागरिकांनी प्रगणकांना आवश्यक ती माहिती प्रामाणिकपणे व वेळेत द्यावी, तसेच या कार्यात प्रशासनाला पूर्ण सहकार्य करावे. – डॉ. उध्दव कदम, तहसीलदार उरण