शिक्षक गौरव ग्रंथाच्या प्रकाशनाची तयारी पूर्ण.
२९ जून रोजी आयोजित कार्यक्रम यशस्वी करण्याचा संकल्प!
जालना/प्रतिनिधी, दि 24
जालना: जिल्ह्यातील ज्येष्ठ शिक्षक आणि सामाजिक कार्यकर्ते ज्ञानोबा वरवट्टे यांच्या जीवनाला आणि शिक्षण क्षेत्रातील त्यांच्या बहुमूल्य योगदानाला समर्पित “शिक्षण: प्रश्न अनेक, उत्तर एक” या गौरव पुस्तकाच्या प्रकाशन समारंभाची तयारी आता अंतिम टप्प्यात पोहोचली आहे. २९ जून रोजी सकाळी १०:३० वाजता मुक्तेश्वर चौकातील मुक्तेश्वर सांस्कृतिक सभागृहात हा समारंभ आयोजित केला जाईल. शहरातील मुक्तेश्वर सांस्कृतिक सभागृहात झालेल्या नियोजन बैठकीत कार्यक्रमाची सविस्तर रूपरेषा आणि सर्व व्यवस्थांवर सविस्तर चर्चा करण्यात आली. मराठवाडा शिक्षक संघाच्या जिल्हा आणि तालुका कार्यकारिणीच्या उपस्थितीत आयोजित बैठकीत पाहुण्यांचे स्वागत, स्टेज व्यवस्थापन, पुस्तकाचे प्रदर्शन, प्रेस माहिती, निमंत्रण वितरण, मीडिया कव्हरेज आणि कार्यक्रमस्थळाची सजावट अशा विविध पैलूंवर गंभीर विचारमंथन करण्यात आले.कार्यक्रम प्रभावी, सन्माननीय आणि प्रेरणादायी करण्यासाठी उपस्थित सदस्यांनी त्यांच्या जबाबदाऱ्या निश्चित करून कार्यभार स्वीकारला. कार्यक्रमाचे प्रमुख पाहुणे महाराष्ट्र विधान परिषदेचे सदस्य सुधाकर अडबाले असतील. प्रमुख वक्ते म्हणून लेखक डॉ. प्रल्हाद लुलेकर उपस्थित राहतील. विशेष पाहुणे म्हणून शिक्षण अधिकारी बाळासाहेब खरात उपस्थित राहणार आहेत. मराठवाडा शिक्षक संघाचे जालना जिल्हाध्यक्ष रमेश आंधळे हे अध्यक्षस्थानी असतील. प्रमुख पाहुणे म्हणून मराठवाडा शिक्षक संघाचे अध्यक्ष सूर्यकांत विश्वासराव, मराठवाडा सरचिटणीस राजकुमार कदम, संपादक मंडळाचे प्रा.पुरुषोत्तम जुन्ने, प्रा.मारुती तेगमपुरे यांचीही उपस्थिती राहणार आहे.
