जात वैधता प्रमाणपत्र मिळण्यासाठी समता पंधरवड्याचे आयोजन
जालना/प्रतिनिधी,दि.2
‘समता पंधरवडा’ कालावधी दि. 1 ते 14 एप्रिल, 2025 या कालावधीत जिल्ह्यातील इयत्ता 11 वी 12 वी विज्ञान शाखेतील सर्व मागासवर्गीय विद्यार्थ्यांना जात वैधता प्रमाणपत्र मिळणेसाठी विशेष मोहिम राबविण्यात येत आहे.
महाराष्ट्र शासनाच्या सामाजिक न्याय व विशेष सहाय्य विभागामार्फत महासंचालक, डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे यांच्या निर्देशानुसार दिनांक 1 ते 14 एप्रिल, 2025 या कालावधीत जालना जिल्ह्यातील इयता 11 वी व 12 वी विज्ञान शाखेत शिक्षण घेत असलेल्या अनुसूचीत जाती, विमुक्त जाती, भटक्या जमाती, इतर मागासवर्ग, विशेष मागासप्रवर्ग व सामाजिक आर्थिक मागास प्रवर्ग एस .ई. बी. सी. (मराठा) या मागास प्रवर्गातील सर्व विद्यार्थ्यांच्या जातीच्या प्रमाणपत्राची पडताळणी करण्यासाठी जिल्हा जाती प्रमाणपत्र पडताळणी समिती, जालना यांचे वतीने महामानव, भारतरत्न डॉ. बाबासाहेब आंबेडकर यांच्या 133 व्या जयंतीचे औचित्य साधून ‘समता पंधरवडा’ या विशेष मोहिमेचे आयोजन करत आहे. जेणेकरून समितीचे कामकाज अधिक पारदर्शक, लोकाभिमुख व गतिमान होऊन विद्यार्थ्यांना विहित वेळेत जात वैधता प्रमाणपत्र मिळू शकेल.
इयता 11 वी व 12 वी विज्ञान शाखेत शिक्षण घेत असलेल्या विद्यार्थ्यांना 12 वी उत्तीर्ण झाल्यानंतर अभियांत्रिकी, वैद्यकीय, कृषी, पशुसंवर्धन, वास्तुशास्त्र, फार्मसी, विधी इत्यादी व्यावसायिक अभ्यासक्रमात आरक्षित जागेवर प्रवेश घेण्यासाठी तसेच सदर अभ्यासक्रमाचे शिक्षण फी ची प्रतीपूती करण्यासाठी जात वैधता प्रमाणपत्राची आवश्यकता असते. तथापि इयत्ता 10 वी व 12 वी विज्ञान शाखेतील विद्यार्थी वेळेत त्यांचे जात प्रमाणपत्र पडताळणीचे प्रस्ताव समितीकडे दाखल करीत नाहीत, पर्यायाने अश्या विद्यार्थ्यांना वरील सवलतीचा लाभ मिळत नाही. सदर अडचण विचारात घेऊन शैक्षणिक वर्ष 2024-25 तसेच 2025-26 मध्ये इयता 11 वी व 12 वी विज्ञान शाखेत शिक्षण घेत असलेल्या विद्यार्थ्यांचे अनुसूचीत जाती, विमुक्त जाती, भटक्या जमाती, इतर मागासवर्ग व विशेष मागासप्रवर्ग, सामाजिक आर्थिक मागास प्रवर्ग एस ई बी सी (मराठा) या मागास प्रवर्गातील सर्व विद्यार्थ्यांच्या जातीच्या प्रमाणपत्राची पडताळणी करण्यात येत आहे.
त्याकरिता संबंधित मागासवर्गीय विद्यार्थ्यांनी त्यांचे जात प्रमाणपत्र पडताळणीचे अर्ज bartievalidity.maharashtra.gov.in या संकेतस्थळावर ऑनलाइन पद्धतीने भरून सदर अर्जाची हार्ड कॉपी जिल्हा जात प्रमाणपत्र पडताळणी समिती, जालना यांचेकडे सादर करावेत. तसेच जालना जिल्हयातील काही महाविद्यालयामध्ये समितीमार्फत शिबिरे आयोजित करण्यात आलेले असून त्याच ठिकाणी संबंधित अर्ज स्वीकारून त्यांना तात्काळ जात वैधता प्रमाणपत्र देण्यात येत आहे. अशी माहिती उपायुक्त जिल्हा जाती प्रमाणपत्र पडताळणी समिती यांनी प्रसिध्दीपत्रकाद्वारे दिली आहे.
